Mumbai Nashik Railway News: मुंबई आणि नाशिक… दोन मोठी शहरे, पण आजही प्रवास म्हटलं की वेळ, गर्दी आणि घाटात अडकलेली गाडी डोळ्यांसमोर येते. मात्र आता हे चित्र बदलण्याची वेळ आली आहे. मुंबई ते नाशिक प्रवास अधिक वेगवान, अधिक सुरक्षित आणि अधिक सोयीचा होणार असल्याचं स्पष्ट संकेत मिळाले आहेत. कारण केंद्र सरकारकडून कसारा ते मनमाड दरम्यान १३१ किलोमीटर लांबीच्या नव्या समांतर रेल्वेमार्गाला अखेर मंजुरी मिळाली आहे. नाशिककरांनी अनेक वर्षं पाहिलेलं मुंबई लोकल थेट नाशिकपर्यंत हे स्वप्न आता कागदावरून जमिनीवर उतरू लागलं आहे. Mumbai Nashik Railway News
मुंबईची लोकल ही केवळ रेल्वे नाही, ती इथल्या माणसांची जीवनवाहिनी आहे. दररोज लाखो लोक या लोकलवर अवलंबून आहेत. आतापर्यंत ही लोकल कसाऱ्यापर्यंतच मर्यादित होती, पुढे घाट, तीव्र चढण, अवघड वळणं यामुळे गाड्यांचा वेग मंदावत असे, बँकर इंजिन लावावं लागे आणि प्रवाशांचा वेळ वाया जाई. पण आता कसारा–मनमाड हा नवा समांतर रेल्वेमार्ग पूर्ण झाल्यानंतर ही अडचण इतिहासजमा होणार आहे.
या महत्त्वाकांक्षी प्रकल्पात घाट परिसरात दोन नवे समांतर रेल्वे ट्रॅक टाकले जाणार असून तब्बल १८ अत्याधुनिक बोगदे खोदले जाणार आहेत. या बोगद्यांमुळे घाटातील चढण लक्षणीयरीत्या कमी होईल. याचा थेट फायदा म्हणजे गाड्यांना अतिरिक्त इंजिनची गरज भासणार नाही आणि घाट ओलांडताना होणारा ३० ते ४५ मिनिटांचा उशीर कायमचा संपेल. प्रवासी ट्रेन असो किंवा मालगाडी, दोन्हींचा प्रवास अधिक सुरळीत आणि वेळेत होईल.
मुंबई ते भुसावळ हा मध्य रेल्वेवरील अत्यंत गजबजलेला मार्ग आहे. सध्या या मार्गावर प्रचंड ताण आहे. हाच ताण कमी करण्यासाठी केंद्र सरकार सुमारे ४,५०० कोटी रुपयांची मोठी गुंतवणूक करत आहे. कल्याण–कसारा आणि मनमाड–भुसावळ दरम्यान तिसऱ्या व चौथ्या मार्गिकेचं काम आधीच सुरू असून, आता कसारामनमाड हा दुवा तयार झाला की संपूर्ण मार्ग अधिक सक्षम होणार आहे.
या प्रकल्पासाठी राज्य सरकारने जमीन संपादनाची प्रक्रिया सुरू केली असून त्याबाबतचं अधिकृत गॅझेटही प्रसिद्ध करण्यात आलं आहे. नाशिक जिल्ह्यातील भगूर, वंजारवाडी, देवळाली, संसरी, विहितगाव, एकलहरे, माडसांगवी, शिलापूर, ओढा, लाखलगाव आणि सिद्ध पिंप्री या गावांमधून हा नवा रेल्वेमार्ग जाणार आहे. या परिसरातील नागरिकांसाठी हा प्रकल्प म्हणजे विकासाची नवी दारे उघडणारा ठरणार आहे.
या नव्या रेल्वेमार्गामुळे केवळ प्रवासाचा वेळ कमी होणार नाही, तर मुंबई–नाशिक थेट लोकल सेवा सुरू करण्याचा मार्गही मोकळा होणार आहे. मेल आणि एक्स्प्रेस गाड्यांचा वेग वाढेल, घाटात होणारी थांबवणूक संपेल, मालवाहतूक सुलभ होईल आणि नाशिक तसेच उत्तर महाराष्ट्रातील औद्योगिक विकासाला मोठी चालना मिळेल. एकूणच, हा प्रकल्प केवळ रेल्वेचा नाही, तर उत्तर महाराष्ट्राच्या भविष्याला दिशा देणारा ठरणार आहे. नाशिककरांसाठी ही केवळ बातमी नाही, तर अनेक वर्षांच्या प्रतीक्षेनंतर आलेली दिलासादायक आशा आहे.