HSRP News Maharashtra: महाराष्ट्रातील वाहनधारकांसाठी आता सावध होण्याची वेळ आली आहे. उच्च-सुरक्षा नोंदणी प्लेट म्हणजेच HSRP बसवण्याची अंतिम मुदत अनेक वेळा वाढवूनही मोठ्या संख्येने वाहनांनी अद्याप नोंदणी केलेली नाही. ३१ डिसेंबरची शेवटची संधीही आता संपली असून, परिवहन विभागाने थेट कारवाईचे संकेत दिले आहेत. त्यामुळे राज्यातील लाखो वाहनधारकांच्या चिंतेत भर पडली आहे.
महाराष्ट्र सरकारने १ एप्रिल २०१९ पूर्वी नोंदणीकृत सर्व वाहनांवर HSRP नंबर प्लेट बसवणे बंधनकारक केले होते. सुरुवातीला ३१ मार्च २०२५ ही अंतिम मुदत देण्यात आली होती. मात्र नागरिकांचा कमी प्रतिसाद, तांत्रिक अडचणी आणि वाहनांची प्रचंड संख्या पाहता ही मुदत टप्प्याटप्प्याने ३० जून, १५ ऑगस्ट, ३० नोव्हेंबर आणि अखेर ३१ डिसेंबरपर्यंत वाढवण्यात आली. तरीही अनेक वाहनधारकांनी याकडे दुर्लक्ष केल्याचे चित्र आहे.
विशेष म्हणजे नागपूर जिल्ह्यातच तब्बल १३ लाखांहून अधिक वाहनांनी HSRP साठी नोंदणी केलेली नाही. परिवहन आयुक्तांच्या स्पष्ट निर्देशानंतर आता आरटीओ प्रशासनाने कारवाईची तयारी सुरू केली आहे. प्रादेशिक परिवहन अधिकारी (ग्रामीण) विजय चव्हाण यांनी सांगितले की, HSRP नसलेल्या वाहनांवर उडत्या पथकांमार्फत तपासणी केली जाईल आणि नियम मोडणाऱ्यांवर दंडात्मक कारवाई केली जाईल.
मात्र दिलासा देणारी बाब म्हणजे, ३१ डिसेंबरपर्यंत ज्यांनी अधिकृत पोर्टलवर नोंदणी करून अपॉइंटमेंट निश्चित केली आहे, अशा वाहनधारकांवर सध्या कोणतीही कारवाई केली जाणार नाही. वाहनचालकांनी HSRP साठी पावती जवळ ठेवल्यास वाहतूक पोलिसांकडून दंड आकारला जाणार नसल्याचेही परिवहन विभागाने स्पष्ट केले आहे.
HSRP न बसवणाऱ्यांसाठी दंड तर आहेच, पण त्यापेक्षा मोठी अडचण पुढे उभी राहणार आहे. परिवहन विभागाने स्पष्ट शब्दांत सांगितले आहे की, ज्या वाहनांवर HSRP नसेल त्यांचे वाहन हस्तांतरण, कर्ज परतफेडीशी संबंधित प्रक्रिया, वाहनांमध्ये बदल, पुनर्नोंदणी तसेच परवाना नूतनीकरण अशा सर्व सेवा थांबवल्या जातील. म्हणजेच एकदा नियम मोडला, तर पुढे अनेक सरकारी कामे अडून बसण्याची शक्यता आहे.
दंडाबाबत बोलायचे झाले तर, पहिल्यांदा नियमभंग आढळल्यास वाहनधारकाला ₹१,००० पर्यंत दंड भरावा लागू शकतो. मात्र वारंवार उल्लंघन केल्यास हा दंड थेट ₹५,००० ते ₹१०,००० पर्यंत जाऊ शकतो. त्यामुळे “थोडं थांबू, नंतर करू” ही मानसिकता आता महागात पडू शकते.
HSRP बसवण्यासाठी वाहनधारकांनी महाराष्ट्र परिवहन विभागाच्या अधिकृत वेबसाइट transport.maharashtra.gov.in वर जाऊन नोंदणी करणे आवश्यक आहे. तेथे शुल्क भरून वेळ निश्चित करता येतो. वाहनांची संख्या मोठी असल्यामुळे अंतिम मुदत पुन्हा वाढेल का, याबाबत चर्चाही सुरू आहे. मात्र प्रशासनाकडून अद्याप यावर अधिकृत घोषणा झालेली नाही. HSRP News Maharashtra
एकूणच, HSRP बाबत सरकार आता नरमाईची भूमिका सोडून थेट कारवाईच्या मार्गावर जात असल्याचे स्पष्ट संकेत मिळत आहेत. त्यामुळे दंड, अडचणी आणि सरकारी कामांचा खोळंबा टाळायचा असेल, तर वाहनधारकांनी वेळ न दवडता HSRP साठी नोंदणी करून घेणेच श्याहणपणाचे ठरेल. आज दुर्लक्ष केलं, तर उद्या पश्चात्ताप करण्याची वेळ येऊ शकते.