Maharashtra Highway News: नाशिक म्हटलं की आजही अनेकांच्या डोळ्यांसमोर कुंभमेळा, गोदावरी घाट, रामतीर्थ आणि द्राक्ष बागाचं चित्र उभं राहतं. पण आता हे चित्र बदलतंय. केंद्र सरकारच्या एका महत्त्वाकांक्षी महामार्ग प्रकल्पामुळे नाशिक केवळ धार्मिक शहर न राहता, महाराष्ट्राचं एक मोठं औद्योगिक आणि लॉजिस्टिक्स हब म्हणून पुढे येताना दिसत आहे.
नाशिक–सोलापूर–अक्कलकोट महामार्गाला केंद्राची मंजुरी
पंतप्रधान नरेंद्र मोदी यांच्या अध्यक्षतेखाली झालेल्या केंद्रीय मंत्रिमंडळाच्या बैठकीत ३७४ किलोमीटर लांबीच्या नाशिक–सोलापूर–अक्कलकोट ६ लेन महामार्गाला मंजुरी देण्यात आली आहे. सुमारे १९,१४२ कोटी रुपयांचा हा प्रकल्प बीओटी (टोल) मॉडेलवर राबवला जाणार असून, विशेष म्हणजे यासाठी महाराष्ट्र शासनावर थेट आर्थिक भार पडणार नाही. हा महामार्ग पुढील दोन वर्षांत पूर्ण करण्याचं लक्ष्य ठेवण्यात आलं आहे. प्रकल्प पूर्ण झाल्यानंतर नाशिकचा संपर्क पश्चिम आणि दक्षिण भारताशी थेट आणि अधिक वेगवान होणार आहे.
दळणवळणाचा अडथळा दूर होणार
गेल्या काही वर्षांत अंबड, सातपूर, सिन्नर, इगतपुरी, दिंडोरी परिसरात उद्योग मोठ्या प्रमाणावर वाढले. मात्र, मजबूत दळणवळण व्यवस्था नसल्याने नाशिकचा औद्योगिक विकास अपेक्षित गतीने होऊ शकत नव्हता. नाशिक–सोलापूर–अक्कलकोट कॉरिडॉर हा हा अडथळा दूर करणारा ठरणार आहे. हा ग्रीनफिल्ड कॉरिडॉर दिल्ली–मुंबई एक्सप्रेस-वे, समृद्धी महामार्ग आणि आग्रा–मुंबई महामार्गाशी थेट जोडला जाणार आहे. यामुळे नाशिक थेट देशातील प्रमुख औद्योगिक पट्टे, बाजारपेठा आणि बंदरांशी जोडले जाईल.
वाढवण पोर्टमुळे निर्यातीला चालना
या महामार्गाचं आणखी एक मोठं वैशिष्ट्य म्हणजे वाढवण पोर्ट इंटरचेंजशी होणारी थेट जोडणी. यामुळे नाशिकमधील द्राक्ष, वाइन, अॅग्रो प्रोसेसिंग आणि मॅन्युफॅक्चरिंग उद्योगांना आंतरराष्ट्रीय बाजारपेठेत पोहोचणं अधिक सोपं होणार आहे. निर्यातक्षम उद्योगांसाठी ही जोडणी ‘गेम चेंजर’ ठरू शकते. Maharashtra Highway News
वेळ, अंतर आणि खर्चात मोठी बचत
या महामार्गामुळे सध्याच्या मार्गांच्या तुलनेत २०१ किलोमीटर अंतर कमी होणार असून, प्रवासाच्या वेळेत सुमारे १७ तासांची बचत होईल. म्हणजेच जवळपास ४५ टक्के वेळ वाचणार आहे. याचा थेट फायदा उद्योगांच्या खर्चावर, इंधन बचतीवर आणि वाहतुकीच्या वेगावर होणार आहे. १०० किमी प्रतितास डिझाइन स्पीड आणि १२० किमी प्रतितास क्षमतेनुसार तयार होणारा हा अॅक्सेस कंट्रोल्ड महामार्ग अपघातांचे प्रमाण कमी करण्यासही मदत करेल.
शेतकऱ्यांसाठी दिलासादायक बातमी
नाशिक जिल्हा हा द्राक्ष, कांदा, भाजीपाला आणि फळबागांसाठी प्रसिद्ध आहे. मात्र, वेळेत बाजारपेठेत माल न पोहोचल्याने शेतकऱ्यांना मोठं नुकसान सहन करावं लागत होतं. हा महामार्ग सुरू झाल्यानंतर नाशिकचा शेतमाल थेट दक्षिण भारतातील मोठ्या बाजारपेठांपर्यंत कमी वेळेत पोहोचणार आहे. यामुळे कोल्ड चेन लॉजिस्टिक्स, वेअरहाउसिंग, अॅग्रो प्रोसेसिंग युनिट्स उभारणीला चालना मिळेल आणि शेतकऱ्यांच्या उत्पन्नातही वाढ होण्याची शक्यता आहे.
रोजगारनिर्मिती आणि ग्रामीण विकास
या महामार्गाच्या बांधकामामुळे हजारो थेट आणि अप्रत्यक्ष रोजगाराच्या संधी निर्माण होतील. स्थानिक युवकांना काम मिळेलच, शिवाय पुढील काळात हॉटेल्स, ट्रान्सपोर्ट, लॉजिस्टिक्स पार्क, पेट्रोल-सीएनजी पंप, इलेक्ट्रिक चार्जिंग स्टेशन यांसारख्या सेवा क्षेत्रांचा विस्तार होईल. विशेषतः नाशिक–अहिल्यानगर–धाराशिव–सोलापूर या पट्ट्यातील ग्रामीण अर्थव्यवस्थेला मोठा हातभार लागणार आहे.
जमीन अधिग्रहणाचा महत्त्वाचा टप्पा पूर्ण
या प्रकल्पासाठी आवश्यक असलेल्या ३,१२२ हेक्टर जमिनीपैकी सुमारे ८० टक्के जमीन ताब्यात घेण्यात आली आहे. यासाठी आतापर्यंत ३,८५३ कोटी रुपये खर्च करण्यात आले असून, उर्वरित प्रक्रिया अंतिम टप्प्यात आहे. प्रशासनाने प्रकल्प वेळेत पूर्ण करण्याची तयारी दर्शवली आहे.
पर्यावरणपूरक आणि शाश्वत विकासावर भर
हा महामार्ग केवळ वेगवान नाही तर पर्यावरणपूरक असणार आहे. नियोजित वृक्षलागवड, पावसाचं पाणी साठवण, वन्यजीवांसाठी अंडरपास-ओव्हरब्रिज, आधुनिक ड्रेनेज सिस्टीम अशा उपाययोजनांमुळे नाशिकसारख्या संवेदनशील भागात पर्यावरणीय समतोल राखण्याचा प्रयत्न केला जाणार आहे.
नाशिकच्या भविष्यासाठी निर्णायक प्रकल्प
एकूणच, नाशिक–सोलापूर–अक्कलकोट ६ लेन महामार्ग हा केवळ रस्ता नसून नाशिकच्या बदलत्या ओळखीचं प्रतीक ठरणार आहे. धार्मिक, कृषी आणि औद्योगिक क्षेत्राचा समतोल साधत नाशिकला महाराष्ट्राच्या लॉजिस्टिक्स नकाशावर केंद्रस्थानी आणणारा हा प्रकल्प भविष्यातील विकासाची दिशा ठरवेल.