Shaktipeeth Highway : नागपूर ते गोवा हा प्रवास अधिक जलद व्हावा, या उद्देशाने प्रस्तावित करण्यात आलेला शक्तिपीठ महामार्ग पुन्हा एकदा चर्चेच्या केंद्रस्थानी आला आहे. एकेकाळी हा महामार्ग राज्यातील सर्वात महत्त्वाकांक्षी प्रकल्प म्हणून मांडला गेला होता, मात्र निवडणुकांच्या काळात या महामार्गानेच राजकारणात मोठी उलथापालथ घडवून आणली. शेतकऱ्यांचा तीव्र विरोध, सुपीक जमिनी जाण्याची भीती आणि पाण्याच्या स्रोतांवर होणारा परिणाम यामुळे हा प्रकल्प सरकारसाठी डोकेदुखी ठरला होता. Shaktipeeth Highway
लोकसभा आणि विधानसभा निवडणुकांच्या दरम्यान या महामार्गाविरोधात उभा राहिलेला रोष इतका वाढला की तत्कालीन सरकारला हा प्रकल्प रद्द केल्याची घोषणा करावी लागली होती. मात्र विधानसभा निवडणुकीनंतर सत्तेत आलेल्या महायुती सरकारने पुन्हा एकदा या महामार्गाला मंजुरी देण्याचा निर्णय घेतला आणि त्यानंतरच नव्या हालचालींना वेग आला. आता मात्र थेट रद्द करण्याऐवजी महामार्गाच्या मूळ आराखड्यातच मोठे बदल करण्याचा निर्णय घेतल्याचे स्पष्ट होत आहे. Shaktipeeth Highway
सांगली, कोल्हापूर आणि सोलापूर जिल्ह्यांतील शेतकऱ्यांनी या महामार्गाविरोधात आक्रमक भूमिका घेतली होती. बागायती शेती, ऊस क्षेत्र, विहिरी, तलाव आणि सिंचन व्यवस्था धोक्यात येणार असल्याचा आरोप करत शेतकऱ्यांनी रस्त्यावर उतरून आंदोलन केले. या सगळ्या पार्श्वभूमीवर मुख्यमंत्री देवेंद्र फडणवीस यांनी महामार्गाचे अलाइनमेंट नव्याने तपासण्याचे संकेत दिले आणि त्यानंतर आता प्रत्यक्षात मार्ग बदलण्याच्या चर्चांना जोर आला आहे.
सध्या मिळत असलेल्या प्राथमिक माहितीनुसार, धाराशिवपासून हा महामार्ग मूळ मार्गावरून वळवून सांगलीच्या आटपाडी मार्गे चंदगडकडे नेण्याचा विचार सुरू आहे. जर हा प्रस्ताव अंतिम झाला तर सोलापूर जिल्ह्यातील उत्तर सोलापूर मोहोळ पंढरपूर आणि सांगोला हे महत्त्वाचे तालुके शक्तिपीठ महामार्गाच्या नकाशातून पूर्णपणे वगळले जाण्याची शक्यता आहे. याशिवाय सांगली जिल्हा देखील मूळ आराखड्यातून बाहेर पडण्याची चर्चा सुरू असून त्याऐवजी माढा आणि माळशिरस तालुक्यांतून महामार्ग नेण्याबाबत पर्यायी पर्याय तपासले जात आहेत.
या सगळ्या घडामोडींमुळे संबंधित भागात संभ्रमाचे वातावरण आहे. काही ठिकाणी महामार्ग आपल्या भागातून वगळला जाणार असल्याने शेतकऱ्यांमध्ये दिलासा दिसतो आहे, तर काही भागात अचानक रूट बदलल्याने चिंता व्यक्त केली जात आहे. दरम्यान शक्तिपीठ महामार्गाविरोधातील संघर्ष अजूनही थांबलेला नाही. बार्शी तालुका शक्तिपीठ विरोधी संघर्ष समिती च्या वतीने सोलापूर जिल्ह्यातील रुई (भालगाव) येथे राज्यस्तरीय मेळावा आयोजित करण्यात आला असून या मेळाव्यासाठी तब्बल दहा जिल्ह्यांतील शेतकरी एकत्र येणार आहेत.
या मेळाव्यात पुढील आंदोलनाची दिशा ठरवली जाणार असून सरकारवर दबाव वाढवण्याची रणनीती आखली जाणार असल्याचे बोलले जात आहे. मात्र महामार्गाच्या नव्या रूटबाबत अद्याप कोणतेही अधिकृत गॅझेट प्रसिद्ध झालेले नाही. तरीही सोशल मीडियावर वेगवेगळ्या अफवा पसरल्या असून काही भागात कोणीही जमीन विकू नका असे संदेश व्हायरल होत आहेत. अधिकृत निर्णय जाहीर होईपर्यंत शक्तिपीठ महामार्गाचा विषय राज्याच्या राजकारणात आणि ग्रामीण भागात चर्चेचा केंद्रबिंदू राहणार, हे मात्र नक्की.