Gold Price Forecast 2026 |सोनं खरेदी करण्याचं स्वप्न पाहणाऱ्या आणि गुंतवणूक करणाऱ्या प्रत्येकासाठी एक मोठी आणि तितकीच धक्कादायक बातमी समोर आली आहे. २०२५ वर्ष संपता संपता सोन्या-चांदीच्या दरांनी जो रॉकेटसारखा वेग धरला होता, तो २०२६ मध्येही थांबण्याचं नाव घेईना. ३१ डिसेंबर २०२५ ला २४ कॅरेट सोन्याचा भाव १,३५,००० रुपयांच्या पार गेला होता, तर चांदीने चक्क २,४०,००० प्रति किलोचा आकडा गाठला होता. आता २०२६ मध्ये हे दर नेमके कुठे जाऊन थांबणार? सामान्यांच्या खिशाला किती कात्री लागणार? हे जाणून घेणं महत्त्वाचं आहे.
सोन्याच्या दरांनी का गाठलंय आभाळ?
गेल्या वर्षभरात सोन्याच्या किमतीत तब्बल ६५ टक्क्यांची वाढ झाली. यामागे सर्वात मुख्य कारण म्हणजे जागतिक स्तरावर सुरू असलेले युद्धजन्य संघर्ष. अमेरिकेचे राष्ट्राध्यक्ष डोनाल्ड ट्रम्प यांची धोरणं आणि ट्रेड वॉरमुळे गुंतवणूकदारांचा डॉलरवरचा विश्वास उडाला आहे. परिणामी, जगभरातील मध्यवर्ती बँकांनी सुरक्षित गुंतवणूक म्हणून सोन्याचा साठा करायला सुरुवात केली. भारतात तर लग्नसोहळे आणि सणासुदीमुळे मागणी वाढलेलीच असते, त्यात रुपयाची घसरण आगीत तेल ओतण्याचं काम करत आहे.
चांदीची ‘क्रेझ’ का वाढली?
चांदीने तर २०२५ मध्ये १८० टक्क्यांची ऐतिहासिक वाढ नोंदवून सर्वांनाच चकित केलं. त्याचं कारण दागिने नसून ‘इंडस्ट्री’ आहे. आजच्या काळात ईव्ही गाड्या, सोलर पॅनल्स, ५जी इन्फ्रास्ट्रक्चर आणि एआय हार्डवेअर या सगळ्यामध्ये चांदीचा वापर अनिवार्य झाला आहे. उत्पादन कमी आणि मागणी जास्त, अशा परिस्थितीत चांदीचे दर गगनाला भिडले आहेत. त्यातच चीनने चांदीच्या पुरवठ्यावर नवीन निर्बंध घातल्याने २०२६ मध्ये चांदीचा तुटवडा जाणवण्याची भीती आहे.
२०२६ मध्ये दर किती होणार?
आंतरराष्ट्रीय संस्था जसे की बँक ऑफ अमेरिका आणि जेपी मॉर्गन यांच्या मते, सोन्याचे दर प्रति औंस ५,००० डॉलर्सपर्यंत जाऊ शकतात. याचाच अर्थ भारतीय बाजारात सोन्याचा १० ग्रॅमचा भाव १,५२,००० रुपयांच्या घरात जाण्याची दाट शक्यता आहे.
सर्वात मोठी खळबळ तर चांदीच्या बाबतीत आहे. जर रुपया असाच घसरत राहिला, तर २०२६ च्या अखेरपर्यंत चांदी २.८० लाख ते ३.२० लाख रुपयांच्या दरम्यान पोहोचेल, असा अंदाज तज्ज्ञांनी व्यक्त केला आहे.
त्यामुळे जर तुम्ही लग्नकार्यासाठी किंवा गुंतवणुकीसाठी सोनं-चांदी घेण्याचा विचार करत असाल, तर या वाढत्या किमतींकडे लक्ष ठेवणं गरजेचं आहे. कारण ज्या वेगाने हे दर वाढत आहेत, ते पाहता ‘आजचं सोनं उद्या स्वस्त वाटेल’ अशीच काहीशी परिस्थिती निर्माण झाली आहे.