PM Kisan Yojana: देशातील कोट्यवधी शेतकऱ्यांसाठी दिलासा देणारी योजना म्हणून प्रधानमंत्री किसान सन्मान निधी योजना ओळखली जाते. वाढती महागाई, बियाणे-खते, डिझेलचे दर आणि बदलते हवामान या सगळ्या अडचणींमध्ये शेतकऱ्यांना थोडा आर्थिक आधार मिळावा, या उद्देशाने केंद्र सरकारकडून ही योजना राबवली जाते. या योजनेअंतर्गत पात्र शेतकऱ्यांना दरवर्षी 6000 रुपये दिले जातात आणि ही रक्कम तीन समान हप्त्यांमध्ये म्हणजेच प्रत्येकी 2000 रुपयांच्या स्वरूपात थेट बँक खात्यात जमा केली जाते.
पीएम किसान योजना डिसेंबर 2018 मध्ये जाहीर झाली होती आणि फेब्रुवारी 2019 मध्ये शेतकऱ्यांना पहिला हप्ता मिळाला. तेव्हापासून आतापर्यंत 21 हप्ते शेतकऱ्यांच्या खात्यात जमा झाले आहेत. आता राज्यासह देशभरातील शेतकरी 22 व्या हप्त्याची आतुरतेने वाट पाहत आहेत. अनेक शेतकऱ्यांसाठी हा 2000 रुपयांचा हप्ता खूप महत्वाचा असतो, कारण याच पैशातून कुणी खत घेतो, कुणी घरखर्च भागवतो, तर कुणी कर्जाचा थोडा हप्ता भरतो.
22 वा हप्ता कधी मिळणार?
पीएम किसान सन्मान निधी योजनेच्या 22 व्या हप्त्याबाबत अद्याप अधिकृत तारीख जाहीर झालेली नाही. मात्र, मीडिया रिपोर्ट्सनुसार हा हप्ता फेब्रुवारी किंवा मार्च महिन्यात शेतकऱ्यांच्या खात्यात जमा होण्याची शक्यता आहे. यापूर्वी 19 वा हप्ता 24 फेब्रुवारी रोजी देण्यात आला होता, त्यामुळे यंदाही त्याच कालावधीत हप्ता मिळू शकतो, असा अंदाज व्यक्त केला जात आहे. 21 वा हप्ता पंतप्रधान नरेंद्र मोदी यांनी तामिळनाडूतील कोइंबतूर येथून जारी केला होता. त्या वेळी सुमारे 9 कोटी शेतकऱ्यांच्या खात्यात 18 हजार कोटी रुपये जमा झाले होते.
ई-केवायसी आणि फार्मर आयडी अनिवार्य
सरकारकडून आता पीएम किसान योजनेसाठी काही महत्वाच्या अटी कडक करण्यात आल्या आहेत. यामध्ये ई-केवायसी आणि फार्मर आयडी या दोन गोष्टी अत्यंत आवश्यक ठरल्या आहेत. ज्या शेतकऱ्यांनी अद्याप ई-केवायसी पूर्ण केलेली नाही किंवा फार्मर आयडी काढलेला नाही, अशा शेतकऱ्यांचा 22 वा हप्ता अडकू शकतो किंवा थांबवला जाऊ शकतो.
ई-केवायसी ही शेतकऱ्यांची ओळख निश्चित करण्यासाठी केली जाते. आधार क्रमांक, बँक खाते आणि मोबाईल नंबर यांची योग्य लिंक असणं आवश्यक आहे. ई-केवायसी पीएम किसानच्या अधिकृत वेबसाईटवरून घरबसल्या करता येते, तसेच जवळच्या सीएससी (कॉमन सर्व्हिस सेंटर) केंद्रावर जाऊनही ही प्रक्रिया पूर्ण करता येते. PM Kisan Yojana
फार्मर आयडी म्हणजे काय आणि तो का आवश्यक आहे?
फार्मर आयडी ही शेतकऱ्यांची एक डिजिटल ओळख आहे. या आयडीमध्ये शेतकऱ्याच्या जमिनीची माहिती, पिकांचा तपशील, वैयक्तिक नोंदी आणि शासकीय योजनांशी संबंधित माहिती समाविष्ट असते. या माध्यमातून सरकारला खऱ्या आणि पात्र शेतकऱ्यांपर्यंतच योजनांचा लाभ पोहोचवायचा आहे. त्यामुळे ज्या शेतकऱ्यांचा फार्मर आयडी तयार झालेला नाही, त्यांना पीएम किसान योजनेचा पुढील हप्ता मिळण्यात अडचणी येऊ शकतात.
शेतकऱ्यांनी काय काळजी घ्यावी?
पीएम किसानचा 22 वा हप्ता वेळेवर आणि कोणत्याही अडथळ्याशिवाय मिळावा, असं वाटत असेल तर शेतकऱ्यांनी तात्काळ ई-केवायसी पूर्ण करणे, फार्मर आयडी काढणे, आधार-बँक खाते लिंक आहे की नाही हे तपासणे आणि जमिनीची नोंद योग्य आहे की नाही याची खात्री करणे गरजेचे आहे. छोट्या-मोठ्या चुका किंवा अपूर्ण कागदपत्रांमुळे हप्ता अडकण्याची शक्यता असते.
आज शेती करणारा शेतकरी अनेक संकटांशी झुंज देतोय. अशा वेळी पीएम किसानसारख्या योजनांचा पैसा वेळेवर मिळणं खूप महत्वाचं ठरतं. त्यामुळे “आपल्याला काहीच करायचं नाही, पैसे आपोआप येतील” असा विचार न करता, आवश्यक कागदपत्रांची पूर्तता करून ठेवणं हाच शहाणपणाचा मार्ग आहे. वेळेत ई-केवायसी आणि फार्मर आयडी पूर्ण केल्यास पीएम किसानचा 22 वा हप्ता नक्कीच खात्यात जमा होईल, अशी अपेक्षा शेतकरी बांधवांनी ठेवायला हरकत नाही.