Post Office RD Scheme | पोस्टाच्या बचत योजनांवर लोकांचा विश्वास आजही तितकाच आहे जितका वर्षांपूर्वी होता. कारण या योजना सुरक्षित, सरकारी हमीसह आणि सर्वसामान्यांना परवडणाऱ्या असतात. अशाच योजनांपैकी आज आपण एक अशी योजना पाहणार आहोत जिथे रोजचे काहीसे पैसे बाजूला काढले तरी पुढील काही वर्षांत लाखोंचा फंड तयार होऊ शकतो.Post Office RD Scheme
पोस्ट ऑफिसच्या रिकरिंग डिपॉझिट (RD) योजनेबद्दल अनेकांना माहिती असते, पण तिच्या कमाईची ताकद नेमकी किती आहे, हे फार कमी लोकांना माहीत असतं. साधं उदाहरण घ्या—रोज फक्त 333 रुपये, म्हणजे महिन्याला 10 हजार रुपये या योजनेत टाकलात तर पुढील काही वर्षांत तब्बल 17 लाखांचा मोठा फंड तयार करता येतो. त्यामुळे कमी उत्पन्न असणाऱ्या व्यक्तीलासुद्धा ही योजना फायदेशीर ठरते.
आजच्या काळात बँकांचे FD व्याजदर घसरत चाललेत. आरबीआयच्या रेपो रेट कपातीचा थेट परिणाम सामान्य गुंतवणूकदारांवर होत आहे. अशा वेळी पोस्ट ऑफिस RD योजना मात्र 6.7% वार्षिक दराने स्थिर आणि हमी व्याज देतेय. फक्त 100 रुपयांपासून खाते उघडता येत असल्याने कोणत्याही वर्गातील नागरिकाला ही योजना सहज परवडते. अगदी 10 वर्षांवरील मुलांच्या नावानेही खाते उघडता येतं; वय 18 झाल्यावर फक्त नवीन केवायसी करावी लागते.
ही योजना सुरुवातीला 5 वर्षांनी मॅच्युअर होते. मॅच्युरिटीच्या वेळी खातेदार संपूर्ण रक्कम काढू शकतो किंवा पुढील 5 वर्षांसाठी वाढवण्याचा पर्यायही मिळतो. म्हणजेच 10 वर्षांचा मोठा बचत कालावधी. यामध्ये छोटी गुंतवणूक करून मोठा फंड तयार होतो. उदाहरण सांगायचंच झालं तर 5 वर्षांत 6 लाखाची बचत होते आणि व्याज म्हणून जवळपास 1.13 लाख मिळतं. पुढील 5 वर्षं सुरू ठेवली तर एकूण जमा रक्कम तब्बल 17.08 लाखांच्या आसपास पोहोचते हीच या योजनेची ताकद.
या योजनेचं आणखी एक वैशिष्ट्य म्हणजे कर्जसुविधा. खाते एक वर्षं पूर्ण झाल्यानंतर खातेदाराला जमा रकमेच्या 50% पर्यंत कर्ज मिळू शकतं. मात्र हे कर्ज घेतल्यास व्याजदरावर 2% अतिरिक्त व्याज द्यावे लागते. पोस्ट ऑफिसकडून इतक्या सोप्या रीतीने उपलब्ध होणारी ही सुविधा सामान्य नागरिकांसाठी खूप उपयोगी ठरते.
RD खाते उघडण्याची प्रक्रिया सुद्धा अगदी सोपी आहे. जवळच्या पोस्ट ऑफिसमध्ये अर्जासोबत फोटो, ओळखपत्र, पत्ता पुरावा आणि नामनिर्देशन भरलं की खाते सुरू. शिवाय आता ई-बँकिंग आणि मोबाईल बँकिंगद्वारेही खाते उघडण्याची सुविधा उपलब्ध आहे.
शेवटी एवढंच बचत ही सवय आहे, आणि पोस्ट ऑफिस RD योजना ही त्या सवयीला दिशा देणारी योजना आहे. सुरक्षितता, सरकारी हमी, चांगला व्याजदर आणि छोट्या बचतीतून मोठा निधी तयार करण्याची क्षमता… या सगळ्यामुळे पोस्ट ऑफिस RD सामान्य माणसासाठी बेस्ट पर्याय ठरते.