Ladki Bahin Yojana double installment update | राज्यातील लाडक्या बहिणींसाठी मकर संक्रांतीचा सण आनंदाचा जाणार की संभ्रमाचा, अशी चर्चा आता गल्लीपासून दिल्लीपर्यंत सुरू झाली आहे. संक्रांतीच्या मुहूर्तावर लाडक्या बहिणींना ३,००० रुपयांची ओवाळणी मिळणार, अशा बातम्या वाऱ्यासारख्या पसरल्या होत्या. मात्र, आता या चर्चेला पूर्णविराम मिळाला आहे. आगामी २९ महापालिकांच्या निवडणुकीच्या पार्श्वभूमीवर राज्य निवडणूक आयोगाने एक मोठा निर्णय घेतला असून, जानेवारी महिन्याचा आगाऊ हप्ता देण्यावर तूर्तास स्थगिती दिली आहे.
निवडणूक आयोगाचा चाप आणि आचारसंहितेचा फेरा
राज्यात सध्या निवडणुकीचे वारे वाहत असून १५ जानेवारीला २९ महापालिकांसाठी मतदान पार पडणार आहे. अशातच मतदारांवर प्रभाव पडू नये म्हणून निवडणूक आयोगाने कडक पावले उचलली आहेत. नियमानुसार, जुन्या योजनांचे नियमित पैसे द्यायला अडचण नाही, पण ‘आगाऊ’ किंवा ‘जास्तीचा’ लाभ देणे हा आचारसंहितेचा भंग मानला जातो. सरकारने १४ जानेवारीला डिसेंबर आणि जानेवारीचे एकत्रित पैसे देण्याची तयारी केली होती, पण विरोधकांच्या तक्रारीनंतर आयोगाने याला ‘ब्रेक’ लावला आहे.
बहिणींना काय मिळणार आणि काय नाही?
या निर्णयामुळे महिलांमध्ये थोडा गोंधळ आहे, पण घाबरण्याचे कारण नाही. ज्या महिलांचे मागील हप्ते काही तांत्रिक कारणांमुळे रखडले होते, त्यांना त्यांची थकबाकी नक्कीच मिळणार आहे. मात्र, नवीन लाभार्थी म्हणून कोणाचीही नोंदणी सध्या करता येणार नाही. थोडक्यात सांगायचे तर, ओवाळणी म्हणून मिळणारे जास्तीचे पैसे आता निवडणुका पार पडल्यानंतरच मिळण्याची शक्यता आहे.
राजकारण तापलं: ‘स्वार्थी भाऊ’ विरुद्ध ‘लाडका भाऊ’
निवडणूक आयोगाच्या या निर्णयानंतर सत्ताधारी आणि विरोधकांमध्ये शाब्दिक युद्ध पेटले आहे. काँग्रेसने सरकारवर ‘स्वार्थी भाऊ’ म्हणत जोरदार हल्ला चढवला आहे. “केवळ निवडणुका डोळ्यासमोर ठेवून बहिणींच्या खात्यात पैसे टाकण्याचा हा प्रयत्न होता,” असा आरोप प्रवक्ते सचिन सावंत यांनी केला आहे. दुसरीकडे, राज ठाकरे यांनीही महायुतीच्या राजकारणावर तोफ डागत उद्योगांच्या आणि पैशांच्या राजकारणाचे वाभाडे काढले आहेत.
महिलांमध्ये संभ्रमाचे वातावरण
सण तोंडावर असताना खात्यात पैसे येतील आणि संक्रांतीची खरेदी करता येईल, अशा आशेवर असलेल्या लाखो महिलांना या निर्णयामुळे थोडा धक्का बसला आहे. ग्रामीण भागात यावरून उलटसुलट चर्चा सुरू आहेत. मात्र, आयोगाच्या स्पष्टीकरणानुसार, नियमित १५०० रुपये मिळण्याचा मार्ग मोकळा असला, तरी ३००० च्या ओवाळणीसाठी मात्र थोडी प्रतीक्षा करावी लागणार आहे.