Ladki Bahin Yojana Next Installment | राज्यातील लाखो लाडक्या बहिणी गेल्या दोन महिन्यांपासून ज्या क्षणाची चातकासारखी वाट पाहत होत्या, तो क्षण अखेर उजाडला आहे. नोव्हेंबर आणि डिसेंबर महिना उलटत आला तरी खात्यात पैसे का जमा झाले नाहीत? सरकार आता एकत्र ४५०० रुपये देणार की काय? अशा अनेक प्रश्नांनी महिलांच्या मनात काहूर माजवलं होतं. पण वर्षाच्या अगदी शेवटच्या दिवशी, म्हणजेच ३१ डिसेंबरच्या सायंकाळी बहिणींच्या मोबाईलवर ‘त्या’ मेसेजची टणटण वाजली आणि चेहऱ्यावर हसू उमटलं.
खरं तर, महापालिका निवडणुकीची आचारसंहिता आणि तांत्रिक कारणांमुळे हा निधी रखडला होता. अनेक ठिकाणी चर्चा होती की, संक्रांतीचं वाण म्हणून सरकार जानेवारीत एकदम तीन महिन्यांचे हप्ते म्हणजे ४,५०० रुपये जमा करणार. मात्र, सरकारने वर्षाअखेर महिलांची निराशा न करता हप्ता जमा करण्यास सुरुवात केली आहे.
खात्यात नेमके किती पैसे आले?
अनेक महिलांना वाटत होतं की रखडलेले सगळे पैसे एकत्र येतील, पण सध्या तरी पात्र महिलांच्या खात्यात नोव्हेंबर महिन्याचा १५०० रुपयांचा हप्ता जमा झाला आहे. ज्या महिलांनी आपली कागदपत्रं आणि विशेषतः ‘केवायसी’ (KYC) प्रक्रिया पूर्ण केली होती, त्यांच्या खात्यात हे पैसे जमा व्हायला सुरुवात झाली आहे. जरी अपेक्षेप्रमाणे तीन महिन्यांचे पैसे मिळाले नसले, तरी नवीन वर्षाच्या तोंडावर १५०० रुपये मिळाल्याने महिलांमध्ये आनंदाचं वातावरण आहे.
KYC बाबत अजूनही संभ्रम
या योजनेचा लाभ सुरू ठेवण्यासाठी ३१ डिसेंबर ही ‘केवायसी’ करण्याची शेवटची तारीख देण्यात आली होती. ज्यांनी ही मुदत पाळली नाही, त्यांचा लाभ बंद होण्याची भीती होती. पण महत्त्वाची गोष्ट म्हणजे, अजूनही केवायसीची लिंक सक्रिय दिसत आहे. सरकारने अधिकृतपणे मुदतवाढ जाहीर केली नसली, तरी तांत्रिक कारणांमुळे पोर्टल सुरू असावे, असा अंदाज वर्तवला जात आहे. त्यामुळे ज्यांचे काम बाकी आहे, त्यांनी तातडीने ते पूर्ण करून घेणं हिताचं ठरेल.
पैसे जमा झाले की नाही कसं ओळखाल?
जर तुम्हाला अजून मेसेज आला नसेल, तर काळजी करू नका. कधीकधी बँकेकडून मेसेज यायला उशीर होतो. अशा वेळी तुम्ही स्वतःहून या पद्धती वापरून खात्री करू शकता:
तुमच्या जवळच्या बँकेत जाऊन पासबुक अपडेट करून घ्या.
गुगल पे, फोन पे किंवा बँकेच्या अधिकृत ॲपवर जाऊन बॅलेन्स चेक करा.
बँकेच्या टोल फ्री नंबरवर मिस्ड कॉल देऊनही तुम्हाला तुमची शिल्लक रक्कम कळू शकते.
तुमच्याकडे एटीएम कार्ड असेल तर जवळच्या मशिनमध्ये जाऊन ‘मिनी स्टेटमेंट’ काढा.
शेवटी काय, तर उशिरा का होईना पण सरकारने दिलेला शब्द पाळला आहे. १५०० रुपयांची ही छोटीशी मदत घरखर्चाला किंवा सणासुदीला हातभार लावणारी नक्कीच ठरेल. आता उरलेले हप्ते जानेवारीच्या मध्यात मिळतात की नाही, याकडे सर्वांचं लक्ष लागलं आहे.