Maharashtra Railway News | महाराष्ट्रातील रेल्वे प्रवाशांसाठी एक दिलासादायक आणि आशेची बातमी समोर येत आहे. गेल्या काही वर्षांत राज्यात अनेक रेल्वे प्रकल्प पूर्ण झाले, काही अंतिम टप्प्यात आहेत तर काहींची कामे वेगाने सुरू आहेत. अशाच पार्श्वभूमीवर आता खानदेशासाठी विशेष महत्त्वाचा ठरणारा एक भव्य रेल्वे प्रकल्प प्रत्यक्षात उतरणार आहे. हा प्रकल्प केवळ रेल्वे मार्ग नाही, तर जळगाव, धुळे आणि संपूर्ण खानदेशाच्या विकासाला नवी दिशा देणारा ठरणार आहे, असं म्हटलं तर वावगं ठरणार नाही.
खानदेश म्हणजे नंदुरबार, धुळे आणि जळगाव या तीन जिल्ह्यांचा प्रदेश. यातील जळगाव आणि धुळे हे दोन महत्त्वाचे जिल्हे आजपर्यंत थेट रेल्वेने जोडले गेले नव्हते, ही वस्तुस्थिती अनेकांना खटकणारी होती. राष्ट्रीय महामार्गामुळे ही दोन्ही शहरे रस्त्याने जोडली गेली असली, तरी रेल्वेने प्रवास करायचा म्हटलं की चाळीसगावचा मोठा वळसा घ्यावा लागत होता. यामुळे वेळ, पैसा आणि त्रास या तिन्ही गोष्टींचा सामना सामान्य प्रवाशांना करावा लागत होता. शेतकरी, विद्यार्थी, नोकरदार, व्यापारी सगळ्यांनाच या अडचणी रोज जाणवत होत्या.
जळगाव ते धुळे थेट रेल्वे मार्गाची मागणी गेल्या अनेक वर्षांपासून सातत्याने होत होती. अखेर ही मागणी मनमाड–धुळे–इंदोर या महत्त्वाकांक्षी रेल्वे प्रकल्पाच्या माध्यमातून पूर्ण होताना दिसत आहे. केंद्र सरकारने मंजुरी दिलेला मनमाड ते इंदोर हा सुमारे ३०९ किलोमीटर लांबीचा रेल्वे मार्ग खानदेशासाठी गेमचेंजर ठरणार आहे. या प्रकल्पामुळे जळगाव आणि धुळे यांच्यातील रेल्वे कनेक्टिव्हिटी अधिक सोपी, जलद आणि स्वस्त होणार आहे.
विशेष म्हणजे हा प्रकल्प केंद्रातील मोदी सरकारचा महत्त्वाकांक्षी प्रकल्प मानला जात असून, त्यामुळे त्याचे काम वेळेत पूर्ण होण्याची शक्यता व्यक्त केली जात आहे. सुमारे १८ हजार कोटी रुपयांचा खर्च अपेक्षित असलेल्या या प्रकल्पासाठी महाराष्ट्रातील दोन आणि मध्य प्रदेशातील चार जिल्ह्यांमध्ये जमिनींचे संपादन सुरू झाले आहे. या एकाच रेल्वे मार्गामुळे जवळपास एक हजार गावे जोडली जाणार असून, सुमारे ३० लाख लोकसंख्येला थेट फायदा होणार आहे, ही बाब खानदेशासाठी अत्यंत महत्त्वाची आहे.
या प्रस्तावित मार्गावर नरडाणा स्थानक एक महत्त्वाचे केंद्र ठरणार आहे. येथे मनमाड–इंदोर रेल्वे मार्ग पश्चिम रेल्वेच्या भुसावळ–उधना मार्गाला छेदणार आहे. त्यामुळे नरडाणा येथे रेल्वे चौफुली तयार होणार असून, येथून उधना, जळगाव, धुळे तसेच शिरपूर–इंदोरकडे जाण्याचे थेट पर्याय उपलब्ध होतील. सध्या जळगावहून धुळे जायचं म्हटलं तर चाळीसगावमार्गे सुमारे १५० किलोमीटरचा प्रवास आणि अडीच तासांहून अधिक वेळ लागतो. त्यातच गाड्यांची संख्या कमी असल्याने प्रवाशांना मोठ्या अडचणींचा सामना करावा लागतो.
यामुळे अनेक प्रवासी नाईलाजाने रस्तेमार्गाचा पर्याय निवडतात. मात्र वाहतूक कोंडी, अपघातांचा धोका आणि वाढलेला खर्च यामुळे हा प्रवासही सोपा राहत नाही. मनमाड–इंदोर रेल्वे मार्ग पूर्ण झाल्यानंतर नरडाणा ते धुळे अंतर अवघे ३५ किलोमीटर राहणार आहे. त्यामुळे जळगावहून धरणगाव, अमळनेर, नरडाणामार्गे धुळे जाणं अधिक सुरक्षित, स्वस्त आणि वेळ वाचवणारं ठरेल.
भविष्यात नरडाणा स्थानकावरून जळगाव–धुळे थेट रेल्वेसाठी वळण मार्ग विकसित झाल्यास खानदेशातील लाखो प्रवाशांसाठी ही सेवा वरदान ठरेल, अशी अपेक्षा व्यक्त केली जात आहे. हा प्रकल्प केवळ दोन शहरांना जोडणारा नसून, संपूर्ण खानदेशाच्या आर्थिक, सामाजिक आणि औद्योगिक विकासाला चालना देणारा ठरणार आहे. वर्षानुवर्षे प्रतीक्षेत असलेलं स्वप्न अखेर प्रत्यक्षात येत असल्याने, खानदेशातील सामान्य माणसाच्या चेहऱ्यावर आता आशेचं आणि समाधानाचं हास्य उमटत आहे.