नवीन वर्ष सुरू होण्याआधीच रेल्वे प्रवाशांसाठी गुड न्यूज! या शहरातून सुरु होणार नवीन एक्सप्रेस गाड्या

Maharashtra Railway News : नवीन वर्ष सुरू होण्याआधीच अहिल्यानगर, पुणे आणि नागपूर जिल्ह्यातील रेल्वे प्रवाशांसाठी दिलासादायक बातमी समोर आली आहे. सध्या नाताळ आणि नववर्षाच्या सुट्ट्यांमुळे अनेक जण गावी, तीर्थक्षेत्रावर किंवा पर्यटनासाठी बाहेर पडत आहेत. अशा वेळी तिकीट मिळणं अवघड, गाड्यांची गर्दी आणि प्रवासाचा त्रास वाढलेला असतो. मात्र या गर्दीच्या काळात मध्य रेल्वेने दोन नवीन विशेष एक्सप्रेस गाड्या सुरू करण्याचा निर्णय घेतल्याने प्रवाशांना मोठा आधार मिळणार आहे. Maharashtra Railway News

रेल्वे प्रशासनाकडून मिळालेल्या माहितीनुसार, हडपसर ते नागपूर आणि पुणे ते नागपूर अशा दोन विशेष गाड्या चालवण्यात येणार आहेत. विशेष बाब म्हणजे या दोन्ही गाड्या अहिल्यानगर जिल्ह्यातील महत्त्वाच्या स्थानकांवर थांबणार आहेत. त्यामुळे पुणे-नागपूर प्रवास करणाऱ्या प्रवाशांसह अहिल्यानगर जिल्ह्यातील नागरिकांनाही या गाड्यांचा थेट फायदा होणार आहे. सणासुदीच्या काळात आणि नववर्षाच्या निमित्ताने प्रवास करणाऱ्यांसाठी ही व्यवस्था खूपच उपयोगी ठरणार असल्याचं रेल्वे प्रशासनाकडून सांगण्यात आलं आहे.

हडपसर ते नागपूर ही विशेष गाडी मध्य रेल्वेच्या मार्गावर धावणार असून नागपूर येथून ही गाडी 27, 29 आणि 31 डिसेंबर 2025 तसेच 3 जानेवारी 2026 रोजी सायंकाळी 7 वाजून 40 मिनिटांनी सुटणार आहे. ही गाडी दुसऱ्या दिवशी सकाळी 11 वाजून 25 मिनिटांनी हडपसर येथे पोहोचणार आहे. तर हडपसर येथून नागपूरकडे जाणारी हीच गाडी 28, 30 डिसेंबर 2025 तसेच 1 आणि 4 जानेवारी 2026 रोजी दुपारी 3 वाजून 50 मिनिटांनी रवाना होणार असून दुसऱ्या दिवशी सकाळी साडेसहा वाजता नागपूरला पोहोचणार आहे.

या विशेष गाडीला अजनी, वर्धा, धामणगाव, बडनेरा, अकोला, शेगाव, मलकापूर, भुसावळ, जळगाव, चाळीसगाव, मनमाड, कोपरगाव, पाचोरा, बेलापूर, अहमदनगर आणि दौंड कॉर्ड लाइन अशा प्रमुख स्थानकांवर थांबा देण्यात आला आहे. त्यामुळे विदर्भ, खानदेश आणि नगर जिल्ह्यातील प्रवाशांना थेट आणि सोयीस्कर प्रवासाचा पर्याय मिळणार आहे.

त्याचबरोबर पुणे ते नागपूर ही दुसरी विशेष गाडी 27, 29, 31 डिसेंबर 2025 आणि 3 जानेवारी 2026 रोजी पुण्याहून रात्री साडेआठ वाजता सुटणार असून दुसऱ्या दिवशी पहाटे दोन वाजेच्या सुमारास नागपूरला पोहोचणार आहे. नागपूरहून पुण्याकडे जाणारी ही गाडी 28, 30 डिसेंबर 2025 तसेच 1 आणि 4 जानेवारी 2026 रोजी सायंकाळी सव्वाचार वाजता सुटेल आणि दुसऱ्या दिवशी पावणे बारा वाजता पुण्यात दाखल होईल.

या पुणे-नागपूर विशेष गाडीला दौंड कॉर्ड लाइन, अहमदनगर, बेलापूर, मनमाड, चाळीसगाव, पाचोरा, जळगाव, भुसावळ, मलकापूर, शेगाव, अकोला, मूर्तिजापूर, बडनेरा, धामणगाव, वर्धा आणि अजनी या स्थानकांवर थांबा देण्याचा निर्णय घेण्यात आला आहे. त्यामुळे नगर जिल्हा आणि मध्य महाराष्ट्रातील प्रवाशांसाठी ही गाडी विशेष फायदेशीर ठरणार आहे.

नवीन वर्षाच्या स्वागतासाठी घराबाहेर पडणाऱ्या प्रवाशांची गर्दी लक्षात घेता या विशेष गाड्यांना चांगला प्रतिसाद मिळेल, असा विश्वास रेल्वे प्रशासनाने व्यक्त केला आहे. एकंदरीत पाहता, वर्षाअखेरीस प्रवासाचा ताण कमी करण्यासाठी रेल्वेने उचललेलं हे पाऊल पुणे, अहिल्यानगर आणि नागपूर जिल्ह्यातील हजारो प्रवाशांसाठी खऱ्या अर्थाने दिलासादायक ठरणार आहे.

हे पण वाचा | रेल्वेने प्रवास करणाऱ्यांना मोठा झटका! आजपासून तिकीट दरात झाली वाढ; खिशावर पडणार ‘इतका’ भार