Maharashtra Weather Update : राज्यात सध्या थंडीने अक्षरशः चांगलाच जोर धरला असून, पहाटेच्या वेळेत अनेक भागांमध्ये गारठा वाढताना दिसत आहे. काही दिवसांपूर्वी किमान तापमानात थोडी वाढ झाल्याने नागरिकांना दिलासा मिळाला होता, मात्र हा दिलासा तात्पुरताच ठरणार असल्याचे संकेत भारतीय हवामान खात्याने दिले आहेत. पुढील २४ तासांत महाराष्ट्रात पुन्हा एकदा कडाक्याची थंडी वाढणार असून किमान तापमानात दोन ते तीन अंशांनी घट होण्याचा इशारा देण्यात आला आहे. Maharashtra Weather Update
राज्यातील बहुतांश भागांत सध्या किमान तापमान १५ अंशांच्या खाली घसरले आहे. उत्तर महाराष्ट्र आणि मध्य महाराष्ट्रात तर गारठा अधिक तीव्र जाणवत आहे. काही दिवसांपूर्वी नाशिक जिल्ह्यातील निफाड भागात तापमान थेट ५ अंशांपर्यंत घसरले होते. सध्या नाशिक, अहिल्यानगर आणि जळगाव या जिल्ह्यांमध्ये किमान तापमान ९ अंशांच्या आसपास नोंदवले जात आहे. थंड हवेचे ठिकाण म्हणून ओळख असलेल्या महाबळेश्वरमध्ये आज तापमान १२ अंश सेल्सिअसवर आहे.
हवामान खात्याच्या अंदाजानुसार पुढील सात दिवस राज्यात कोरडे हवामान राहणार असून, थंडीचा जोर मात्र वाढतच जाणार आहे. विशेषतः उत्तर महाराष्ट्र, मध्य महाराष्ट्र आणि मराठवाड्यात किमान तापमान ७ ते ९ अंशांपर्यंत खाली येण्याची शक्यता वर्तवण्यात आली आहे. विदर्भात पुढील पाच दिवस हवामानात फारसा बदल होणार नसला तरी सकाळी आणि रात्री गारवा कायम राहणार आहे.
सध्या उत्तर भारतात पंजाब, हरियाणा आणि उत्तर प्रदेशात कडाक्याची थंडी पडली असून, पंजाबमध्ये तापमानाचा पारा ५ अंशांपर्यंत घसरला आहे. २७ ते २९ डिसेंबरदरम्यान हिमाचल प्रदेश, उत्तराखंड आणि जम्मू-काश्मीरमध्ये थंडीची तीव्र लाट राहणार असल्याचा इशाराही हवामान विभागाने दिला आहे. याच थंड हवेचा प्रभाव महाराष्ट्रावर पडत असल्याने राज्यात गारठा अधिक वाढण्याची शक्यता व्यक्त केली जात आहे.
आजच्या तापमानाचा विचार केला तर अहिल्यानगरमध्ये ९.३ अंश, जळगावमध्ये ९.७ अंश, नाशिकमध्ये ९.५ अंश तर धाराशिवमध्ये १०.४ अंश तापमान नोंदले गेले आहे. परभणीमध्ये ११ अंश, छत्रपती संभाजीनगरमध्ये १२ अंश, सातारा १२.१ अंश, सांगली १३.२ अंश, सोलापूर १३.८ अंश आणि कोल्हापूरमध्ये १५.३ अंश तापमान आहे. पुणे, सांगली, सातारा, सोलापूर आणि कोल्हापूर जिल्ह्यांत पुढील २४ तास गारठा कायम राहणार असून, नाशिक आणि जळगावमध्ये शीतलहरींचा थेट फटका बसण्याची शक्यता आहे.
मराठवाड्यात छत्रपती संभाजीनगरसह काही भागांत आकाश अंशतः ढगाळ राहणार असून किमान तापमान ९ ते ११ अंशांदरम्यान राहील, असा अंदाज हवामान विभागाने व्यक्त केला आहे. थंडी वाढत असल्याने लहान मुले, ज्येष्ठ नागरिक आणि शेतकऱ्यांनी विशेष काळजी घेण्याचे आवाहन हवामान खात्याकडून करण्यात आले आहे.