PM Kisan eKYC Update | पंतप्रधान किसान सन्माननिधी योजनेच्या हप्त्याची वाट पाहणाऱ्या कोट्यवधी शेतकऱ्यांसाठी एक मोठी आणि महत्त्वाची बातमी समोर आली आहे. नवीन वर्षाच्या सुरुवातीलाच केंद्र सरकार शेतकऱ्यांच्या खात्यात २२ व्या हप्त्याचे २ हजार रुपये जमा करणार आहे. आतापर्यंत २१ हप्ते सुखरूपपणे शेतकऱ्यांच्या पदरात पडले असले, तरी २२ व्या हप्त्यासाठी मात्र सरकारने एक नवी आणि कडक अट लागू केली आहे. जर तुम्ही ही अट पूर्ण केली नाही, तर तुमच्या हक्काचे पैसे अडकू शकतात.
नेमकी नवी अट काय आहे?
केंद्र सरकारने आता सर्व पात्र शेतकऱ्यांसाठी ‘Farmer ID’ (शेतकरी ओळखपत्र) तयार करणे आणि तो योजनेशी लिंक करणे अनिवार्य केले आहे. हा आयडी म्हणजे शेतकऱ्याची एक प्रकारची डिजिटल कुंडलीच आहे. यामध्ये तुमची वैयक्तिक माहिती, जमिनीचा तपशील आणि तुम्ही कोणती पिके घेता, याची सर्व नोंद असणार आहे. यामुळे खरंच गरजू शेतकऱ्यांपर्यंत लाभ पोहोचतोय की नाही, हे सरकारला स्पष्टपणे समजणार आहे. सोप्या भाषेत सांगायचे तर, बोगस लाभार्थ्यांना चाप लावण्यासाठी सरकारने हे पाऊल उचलले आहे.
घरबसल्या Farmer ID कसा तयार करायचा?
शेतकरी मित्रांनो, हा आयडी बनवण्यासाठी तुम्हाला कुठेही हेलपाटे मारण्याची गरज नाही. तुम्ही स्वतः तुमच्या मोबाईलवरून AgriStack पोर्टलवर जाऊन ‘Create New User’ वर क्लिक करून नोंदणी करू शकता. यासाठी आधार कार्डला मोबाईल नंबर लिंक असणे आवश्यक आहे, कारण त्यावर येणाऱ्या OTP शिवाय ही प्रक्रिया पूर्ण होणार नाही. जमिनीचा खासरा क्रमांक आणि कुटुंबाची माहिती भरल्यानंतर महसूल विभागाची (Revenue Department) निवड करून तुम्हाला डिजिटल स्वाक्षरी करावी लागेल.
वेळेत काम पूर्ण करा, अडचण टाळा
शेतीकामाच्या गडबडीत अनेकदा आपण अशा तांत्रिक गोष्टींकडे दुर्लक्ष करतो. पण लक्षात ठेवा, हा डिजिटल आयडी केवळ २२ व्या हप्त्यासाठीच नाही, तर भविष्यात येणाऱ्या सर्व शासकीय योजनांचा लाभ घेण्यासाठी तुमच्याकडे असणे गरजेचे आहे. त्यामुळे ऐनवेळी धावपळ करण्यापेक्षा आजच आपला Farmer ID तयार करून लिंक करून घ्या.
सरकारचा हा निर्णय पारदर्शकता आणण्यासाठी असला, तरी ग्रामीण भागातील सामान्य शेतकऱ्याला हे तंत्रज्ञान वेळेत अवगत करावे लागणार आहे. शेवटी, घाम गाळून पिकवणाऱ्या शेतकऱ्याचा एकही हप्ता तांत्रिक कारणास्तव थांबू नये, हीच माफक अपेक्षा.