Train Update | रेल्वेने प्रवास करणाऱ्या हजारो प्रवाशांसाठी ही बातमी अत्यंत महत्त्वाची आणि तितकीच त्रासदायक ठरणारी आहे. दौंड–मनमाड रेल्वे मार्गावर सुरू असलेल्या दुहेरीकरणाच्या कामामुळे रेल्वे प्रशासनाने १५ ते २५ जानेवारीदरम्यान तब्बल १० दिवसांचा मेगा ब्लॉक जाहीर केला आहे. या ब्लॉकचा थेट परिणाम पुण्यातून धावणाऱ्या वर्दळीच्या गाड्यांवर होणार असून अनेक गाड्या रद्द, तर काही गाड्यांचे मार्ग बदलण्यात आले आहेत.
दौंड ते काष्टी दरम्यान प्री-नॉन इंटरलॉकिंग आणि नॉन-इंटरलॉकिंगचे महत्त्वाचे तांत्रिक काम हाती घेण्यात आले आहे. या कामासाठी ट्रॅफिक आणि पॉवर ब्लॉक घेतला जाणार असल्याने, रेल्वे सेवा विस्कळीत होणार आहे. विशेषतः पुणे–सोलापूर आणि पुणे–अमरावती मार्गावर नियमित प्रवास करणाऱ्या नोकरदार, विद्यार्थी आणि ग्रामीण भागातील प्रवाशांना याचा मोठा फटका बसण्याची शक्यता आहे.
या कालावधीत पुणे–सोलापूर मार्गावरील अनेक गाड्या पूर्णतः रद्द राहणार आहेत. यामध्ये पुणे–सोलापूर एक्स्प्रेस (12169/12170), सोलापूर–पुणे इंटरसिटी (12157/12158), पुणे–सोलापूर व सोलापूर–पुणे डीईएमयू (11417/11418) तसेच पुणे–दौंड डीईएमयू (71401/71402) या महत्त्वाच्या गाड्यांचा समावेश आहे. रोजच्या प्रवासासाठी या गाड्यांवर अवलंबून असलेल्या प्रवाशांना पर्यायी व्यवस्था शोधावी लागणार आहे.
तसेच २३ ते २६ जानेवारीदरम्यान काही लांब पल्ल्याच्या गाड्याही रद्द करण्यात आल्या आहेत. पुणे–अमरावती एक्स्प्रेस (11025/11026), अमरावती–पुणे एक्स्प्रेस (12119), अजनी–पुणे एक्स्प्रेस (12120), निजामाबाद–पुणे एक्स्प्रेस (11410), पुणे–नागपूर गरीब रथ (12113/12114) आणि पुणे–नांदेड एक्स्प्रेस (17629/17630) या गाड्या या काळात धावणार नाहीत.
मेगा ब्लॉकमुळे काही गाड्यांचे मार्गही बदलण्यात आले आहेत. यशवंतपूर–चंदीगड एक्स्प्रेस, जम्मूतवी–पुणे एक्स्प्रेस आणि हजरत निजामुद्दीन–वास्को-द-गामा एक्स्प्रेस या गाड्या मनमाड–इगतपुरी–कल्याण–पनवेल–लोणावळा मार्गे पुण्यात पोहोचणार आहेत. सातारा–दादर एक्स्प्रेस जेजुरी मार्गे, तर तिरुवनंतपुरम–CSMT एक्स्प्रेस कुर्डुवाडी–मिरज मार्गे धावणार आहे. Train Update
काही गाड्यांचा प्रवास पुण्यापर्यंत न येता मधल्या स्थानकांवरच थांबवण्यात येणार आहे. इंदूर–दौंड आणि ग्वाल्हेर–दौंड एक्स्प्रेस या गाड्या खडकी स्थानकावरच थांबतील. २४ व २५ जानेवारी रोजी दौंड–इंदूर एक्स्प्रेस दौंडऐवजी पुणे स्थानकावरून दुपारी ३:३३ वाजता सुटेल, तर दौंड–ग्वाल्हेर एक्स्प्रेस २५ जानेवारीला खडकी स्थानकावरून रात्री १२:२५ वाजता रवाना होईल.
या सर्व बदलांमुळे प्रवाशांचा गोंधळ टाळण्यासाठी रेल्वे प्रशासनाने महत्त्वाचे आवाहन केले आहे. प्रवासासाठी घरातून निघण्यापूर्वी IRCTC, NTES किंवा अधिकृत रेल्वे संकेतस्थळावर गाडीचे अद्ययावत वेळापत्रक नक्की तपासावे, असे सांगण्यात आले आहे. थोडी खबरदारी घेतली तर मोठी गैरसोय टाळता येऊ शकते, असा सल्लाही रेल्वे विभागाने दिला आहे. पुणे रेल्वे प्रवाशांसाठी हे पुढील दहा दिवस संयमाची परीक्षा पाहणारे ठरणार असले, तरी दुहेरीकरणाचे काम पूर्ण झाल्यानंतर भविष्यातील प्रवास अधिक वेगवान आणि सुरक्षित होईल, अशी अपेक्षा व्यक्त केली जात आहे.